A COVA DA TERRA

O mércores 15 de outubro ás 20.30hr no local da Cova da Terra teremos o pracer de contar coa Juan Carlos F. Naveiro do Grupo DOXA de Filosofía e José Mª Álvarez Castro, editor do libro "Ás voltas coa diversidade cultural. As conferencias de Claude Lévi-Strauss para a UNESCO", que temos á venda na Cova, para falar sobre a diversidade cultural e biolóxica.

"A defensa do noso idioma é unha batalla fundamental dun obxectivo máis amplo, a supervivencia da nosa cultura, o cal á súa vez se enmarca no contexto da interacción entre as diversas identidades culturais do noso planeta. Tanto a tentativa de preservarmos en xeral a diversidade cultural como a de mantermos viva en concreto a nosa lingua veñen sendo obxecto nos últimos tempos de agresións máis ou menos explícitas, máis ou menos bastas, mais nunca inocuas. É por iso que recollemos neste volume as conferencias que o egrexio antropólogo Claude Lévi-Strauss elaborou por encomenda da UNESCO contra o racismo, sentando as bases dunha civilización mundial na que as diversas culturas poidan perpetuar a súa orixinalidade de xeito harmónico. Estamos daquela a botar man de décadas de esforzo internacional na procura dun consenso sobre diversidade cultural, e a empregalas como compás co que navegarmos en galego no mar da civilización mundial."